Assam-ah Covid-19 vanga thi mi 11 an tling tawh

Assam state-ah coronavirus kai zinga pakhat chu Pathianni khan a thi a, an state-ah he hri vanga thi hi mi 11 an tling ta a ni. 

Covid-19 vanga thi hi kum 45 mi, Hemanga Majumdar a ni a, Gu­wahati-a Khanapar-a cheng a ni. Health mi­nister Himanta Biswa Sarma chuan Inrinni liam ta zan rei tawh lamah khan Gauhati Medical College and Hospital (GMCH) ah hruai a nih thu leh, hetihlai pawh hian a dinhmun a ṭha tawh lo hle tih a sawi. Doctor-te chuan theihtawp chhuah mah se an chhan thei ta lo a ni, a ti. 

Assam-ah hian hri kai hmuh tawh hi 7,166 an awm tawh a, an zinga 4,814 chu enkawl dam an ni tawh a ni. 

State khawpui, Gu­wahati-ah hmun danga zin chhuahna nei lo zing­ah hri kai eng emaw zat hmuh chhuah an nih avangin, state sorkar chuan mipuia hri darh tur venna atan nimin aṭang khan khawpui chhungah total lockdown a puang a, ni 14 chhung hman a ni ang. Inkharkhipna kalpui chhung hian khawpui chhunga sorkar leh private office-te khar vek a ni dawn a, public transport service pawh tihtawp a ni ang. Hei bakah hian state pumah zing dar 7 aṭanga a tuk zing dar 7 thleng curfew puan a ni bawk ang. 

Hri leng vanga an buai mek laiin, state chhunga district tam zawk chuan tuilian vangin harsatna an tawk mek bawk. Tuilian hian ziaawm lam a la pan thei lo a, district 23-a cheng mi nuai 9.3 dawn chu a nghawng a ni. Pathianni khan tuilian vangin mi pahnihin nunna an chan leh a, kumina tuilian vanga nunna chan hi 18 an tling tawh a ni.