Bangkok-ah Northeast India Festival vawi 2-na nei leh dawn

Northeast India Festival vawi hnihna chu July 29-31 hian Thailand khawpui, Bangkok-ah neih a ni dawn. Kum 2019 khan a vawi khatna neih a lo ni tawh a ni.

Festival hi India embassy-in a huaihawt ni dawn a, Bangkok-a Central World-ah neih a ni ang.

Kum 2019, February khan a vawi khatna turin socio-cultural Trust Trend MMS buatsaihin Northeast Festival hi buatsaih a ni a, hmarchhak state-te tan tourism, agro leh food processing sector lamah sumdawnna kawng ṭha tak a hawnsak a ni.

Thailand-a Indian embassy chuan kumina festival neih turah hian hmarchhak state pariat aṭanga micro, small leh medium enterprise-te thil siamchhuah hrang hrangte pho chhuah a ni dawn tih a sawi. July 30 hian tourism, trade leh investment lam pualin tourim B2B Meet leh trade meet buatsaih a ni bawk ang.

Ni thum awh tur, NorthEast India Festival hi July 20 tlaia Bangkok-a Hotel Centara Grand-ah hawn a ni dawn a, union minister of state for external affairs Dr Rajkumar Ranjan Singh chu khuallian a ni ang. Festival-ah hiah hmarchhak state-a chief minister leh minister eng emaw zat bakah sorkar official-te an tel dawn a, Thailand official-te pawh an tel bawk dawn a ni.

Hmarchhak state hrang hrang aṭangin musician leh dancer, craftmen, sumdawng mi, tour operator leh academician-te an tel bawk ang.