Manipur : Covid hri kai pun zel vangin August 7 thleng school khar

Manipur governor La Ganesan chuan an state-a Covid-19 hri kai an pun zel avangin, venthawn thilah Class 7 leh a hnuai lam chin chu August 7 thleng school khar turin a ti.

Class leh a chung lamte erawh chu vawiin aṭangin school an kal thung ang.

State sorkar hian hri kai an pun avangin school summer vacation chu July 24 thleng atan a lo pawtsei tawh a ni.

State chhunga hri leng dinhmun leh vaccine lak tawh dante zirchian hnuah, sorkar chuan naupang kum 12 huai lamte chu vaccine pek an la ni ve loh avangin an tan hri kai a hlauhawm zual bik a, hei vang hian Class 7 hnuai lam chin chu school la kal tir loh a rel a ni.

Hri leng laka invenna tura sorkarin kaihhruaina a siamte chu khauh taka kenkawh a ni dawn tih sorkar chuan a sawi a, Class 8 leh a chunglamte school an kal hunah pawh thupek hi ṭha taka zawm tura tih an ni.

State health department-in a tarlan danin, Manipur-ah hian Covid-19 vaccine dose khatna la hi 16,06,824, dose hnihna la 12,28,032 leh precautionary dose la hi 1,66,063 an awm tawh.

Manipur-a Covid-19 hri kai hmuh chhuah hmasa ber chu kum 2020, March 24-ah khan a ni a, hemi kum July 29 khan hripui vanga thi hmasa ber record a ni bawk.