Manipur : Bandh leh kawngpui dan khapna dan thar duan remti

Manipur State Cabinet chuan Thawhlehni khan state chhunga pawl hrang hrangten sorkar kar nana bandh leh National Highway (NH) an dan ṭhinin mipui nawlpui a ngawng dan te thlir let a, hetiang thil hi a thlen tawh lohna turin dan thar duan a remti.

Kerala, West Bengal leh Meghalay-te hnung zuiin Manipur chuan dan thar duang tur hian ruahmnna a siam ta a ni. State Cabinet chuan nawrh huaihawtten bungrua an tihchhiat leh thil dang an tihchhiatte rulhna tur an chawi tawh dawn tih a sawi a, an zingah thiam loh chantir an awm a nih chuan sorkar hna an thawh a rem ve dawn loh bakah, sorkar aṭanga hamṭhatna awm thei angte an dawn ve a rem tawh dawn lo a ni, a ti. Cabinet chuan pawl ṭhenkhat lungawiloten an thil phut a hlawhtlin theih nana bandh leh kawngpui danchah an kalpui ṭhin chu ṭha a tih loh thu sawiin, mipuite dikna chanvo rahbeh sakna leh, ram danpui Article 19 leh 21 bawhchhiatna a ni, a ti. Hei hi Supreme Court pawhin dankalha chetna ah a puang a ni, a ti. Cabinet chuan mimal emawin mi ṭhenkhat hmanruah hmanga harsatna an thlen pawhin sorkarin an chungah hremna a lek zel dawn tih a tarlang bawk.

Manipur Cabinet chuan sorkar Department zawng zawngah Internal Finance Division (IFD) din a remti bawk. Meeting kaihhruaitu Chief Minister N. Biren Singh chuan IFD chu sorkar inrelbawlna mumal leh changtlung zawk a awm theih nana ruahmanna nih thu a sawi. Hei bakah hian cabinet chuan Manipur Sports Development Authority din a remti a, sport lama mi chungchungte chu Meritorious Sports Quota hnuiah sorkar hna pek a remti. Hei bakah hian Pay Scale ennawn a remti bawk.