Meghalaya : Bawng khapna dan duhlohna lantir zel

Sorkar laipuiin hralh sum atan leh ei atana bawng hman khapna thu thupek a tichhuah chuan nghawng nei chho zelin, ram chhung hmun hrang hrangah dodalna lantir a ni a, hmarchhak state Meghalay-ah pawh mi tam takin dodalna an lantir.

Garo hills-ah chuan bawng hmanga sum­dawng intelkhawmte chuan sorkar laipui thuchhuah hi an zawm loh tur thu an sawi. South West Garo Hills-a Garo­badha cattle market-ah chuan lungawi lo mi tam tak an pungkhawm bawk. Garobadha hi Bangladesh ramri dep international border kianga awm a ni a, bawng hmanga sumdawnna hmun lian tak pakhat a ni. Lungawilote chuan sorkar laipui thu­chhuah hi zawm an tum loh thu sawiin, zawm tura tihluih an nih chuan BJP hruaitute tan Garo hills leh a chheh vel tlawh an remti dawn lo tih an sawi.

Bawng vulh chu an eizawnna pawimawh ber pakhat an nih thu an sawi a, bawng hmanga eizawng chhungkaw tam tak an awm tih an sawi. Hemi a nih avang hian sorkar thuchhuah chu an zawm thei lo tih an sawi a, an dam khaw chhuahna turin an eizawnna chu an kalpui zel tur thu an sawi. Thawhlehni khan bawng hmanga eizawng mi tam tak an pungkhawm a, lungawi lohna an lantir a ni. Pungkhawmte chuan an sumdawnna chu Garo Hills Autonomous District Council (GHADC) thuneituten uluk takin an vil reng ṭhin tih sawiin, dankalha sumdawnna kalpui a nih loh thu an sawi bawk.

Meghalaya-ah hian bawng hmanga sum­dawnna hi a lian hle a, kar khatah bawng ṭha­hnem tak an talh ṭhin a, 3,000 talh tlin chang pawh an nei nia tarlan a ni. Eizawnna atan hmang pawh an tam hle a ni. Sorkar laipuiin thuchhuah a siam tak avang hian mi tam tak chuan an eizawnna an chan mai ang tih an hlau hle a, kawng hrang hrangin dodalna an lantir a ni. May 23 khan sorkar laipui chuan Prevention of Cruelty to Animals (Regulation of Livestock Markets) Rule 2017 tlawhchhanin talh atana bawng hralh khapna hi a tichhuak ta a ni.

Meghalaya-a Bha­ratiya Janata Party (BJP) hruaitute chuan sorkar laipui thupek hi sut a nih loh chuan party chhuahsanah an vau ve mek bawk. State BJP Vice President John Antonius Lyngdoh chuan thupek hian party hruatitute a tilawm lo hle tih sawiin, sut leh a nih loh chuan party chhuahsan an hreh loh thu a sawi. Hemi chungchangah hian party meeting an neih tawh thu sawiin, an beisei anga thil a kal lo a nih chuan lungrual taka party chhuahsan mai a ngai dawn niin Food and Civil Supplies Minister hlui Antonius Lyngdoh chuan a sawi.