Kan fate hi an ram chunga thuneitu ber an ni tur a ni: NPF

Nagaland-a eptu party lian ber, Naga People's Front (NPF) chuan Citizenship (Amendment) Act an dodal zel dawn tih sawi nawn lehin, party president Shurhozelie Lie­zietsu chuan Naga hnam zinga CAA thlawptute chu eng vanga he dan hi thlawp nge an ni tih chiang taka sawi turin a ti. 

Liezietsu chuan thu­chhuah siamin, hmar­chhak mipui, a bikin Naga hnamte chuan CAA hi thil thui tak thlir chunga a nihna dik tak an hriathiam a ngai tih a sawi. "Parliament in hniha vote lak ṭuma thlawptute khan chhuanlam leh sawifiahna hrang hrang an nei a, he Act-in ILP hmanna a huam ve dawn lo tih te, Nagaland state telh a ni ve dawn lo tih te, Manipur-ah chuan ILP hman tir an ni dawn tih te leh a dang dangte an sawi. Heng an chhuanlam siamte hi thil ṭha tak angin lang mah se, he dan siam tharin a thil tum tak thup a tumna hmanrua mai a ni," tiin NPF president chuan a sawi a ni. 

CAA  in a nghawng chu muang changin a la rawn lang chhuak zel dawn a ni tiin, Lietzietsu chuan mipuite chuan an tuar mai nghal dawn lo a, mahse hun rei zawkah a nghawng a rawn lang nasa telh telh ang, a ti. " Kan fate, kan thlahte hi anmahni ram ngeiah mikhual ang maia an awm tur hi kan duh lo. Pathianin a pek an ramah a thuneitute ber ni zel turin kan duh a ni" tiin a sawi. He dan hmang hian an fate hmachhawn lo tura an lo duh ṭhin, dinhmun derthawn tak chu hmarchhak bial chuan a hmachhawn chho dawn a ni, a ti.