Indian Civil Service : Hmarchhak aṭangin mi 22 inziak tling

Union Public Service Commission (UPSC)-in Indian Civil Services (Mains) Examinations, 2016 a buatsaihah hmar­chhak aṭangin mi 22 an inziak tling.

Hmarchhak state pasarih zingah Assam, Manipur, Aruanchal Pra­desh, Tripura leh Sikkim aṭangin civil service-ah hian tling an awm a ni. Assam aṭanga inziak tling an tam ber a, Manipur-in an dawt a ni. Assam aṭang hian mi 12 an inziak tling a, hmarchhak state dang aṭanga tling belh khawm aiin an tam zawk. Manipur aṭanga civil service-a insiak tling te chu - Sanjenbam Sadananda (616), Kshetrimayum Ravikumar (769), Esther Laltankim Serto (1075) leh Yow Peter Raiphea (1080)-te an ni. Hetih lai hian Arunachal Pradesh aṭanga inziak tling Mamu Hage (691), Chajat Lowang (857) leh Duyu Kampu (1081)-te hi an vaiin hmeichhia vek an ni. Tripura aṭanga inziaktling Suchismita Kanungoe chuan a pumpuiah 261-na a hauh phak a, Tarit Kanti Chakma chuan 730-na a hauh phak bawk. Sikkim state aṭanga inziaktling Henuka Rai chu Indian Agricultural Research Institute, New Delhi-a Ph.D tilai a ni.

UPSC main exam hi nikum December khan neih a ni a, personality test chu kumin March leh May thla khan neih a ni. A pumpuiah Nandini K.R (Karnataka) chu pakhatna a ni a, Anmol Sher Singh Bedi leh Gopalakrishna Ronanki-te'n an dawt a, hmarchhak aṭanga ti

ṭha ber chu Suchismita Kanungoe (Tripura) a ni. A pumpuiah mi 1,099 an inziak tling a, heng zinga 500 chu General Category niin, Other Backward Class (OBC) aṭanga inziak tling 347 awmin, Scheduled Caste (SC) 163 leh Scheduled Tribe (ST) 80 an awm ve bawk. Hetih lai hian hmarchhak state Mizoram leh Nagaland aṭangin central cervice-ah hian inziak tling an awm lo a ni.