Assam sorkarin HSLC-a zirlai tiṭha te scooty pe dawn

Assam Education minister Himanta Biswa Sarma chuan Board of Se­condary Education, Assam (SEBA) hnuaia HSLC exam-a zirlai tiṭha, a bikin hmeichhia te chu scooty pek an ni dawn tih a sawi.

Minister Himanta Biswa Sarma chuan zirna kawnga state-in hma a sawn theih nan HSLC exam-a zirlai tiṭha zual hmeichhia 1,000-te chu scooty pek vek an nih tur thu a sawi a, subject tina mark hmu sang te chu laptop pek an nih tur thu a sawi bawk. Education minister Sarma chuan, SEBA hnuaia board exam chu fimkhur taka kalpui a nih thu sawiin, heti chung hian kum hmasa aiin exam hmachhawn zirlaiten phal loh thil an ti nasa a, a pawi hle a ni, a ti. Hetih rual hian result tihchhuah taka government school aṭanga zirlaiten private school-a kal an tluk lo chu zirchian a, ennawn a nih tur thu a sawi.

All Assam Students Union (AASU) chuan government school result chhiat chhanah state sorkar an puh a, Education minister Himanta Biswa Sarma chu mawhphurtu a ni, an ti. HSLC result chu zirna lama hmasawnna a awm loh zia leh, state sorkarin zirna a ngaih pawimawh tawk lo zia tarlanna a nih thu an sawi bawk.