Cyclone Mora siperin hmarchhak a nuai Nagaland-ah mi 2-in nunnn an chan

Cyclone Mora-in ṭhenawm ram Bangladesh a nuai a, a siper hian hmarchhak bial chuan dawngin Nagland-ah chuan mi pahnihin nunna an chan tawh a ni.

Nagland-ah hian ni eng emaw zat chhung chu ruah a sur tawh a, Phek district-ah chuan tuilian avangin mi pahnih an thi tawh a, chin hriait loha awm an awm bawk. Chhungkaw pakhat chu zana an mut laiin tuilianin an chenna-in a chim thut a, chhungkaw member panga zinga pali chu an chin hriat lohin an awm mek a, pakhat chu inham chhuakin, a ni pawh hian hliam a tuar a ni. Nagaland State Disaster Management Authority chuan he thil hi May 31 zana thleng kha a nih thu an sawi a, bo zinga mi pahnih chu an ruang hmuh a nih tawh thu leh, midang pahnih zawn hna chu thawh leh mek a nih thu an sawi. Phek district-ah vek hian Meluri khuaah sangha khawina dil eng emaw zat chu tuilian hian a chim tawh a ni.

Tuilian hian Phonkuri khuaah lei pahnih ala tawh bawk a, hei hian inkalpawhna kawngah harsatna a thlen mek a ni. Mokokchung district-ah pawh tuilian leh thli tleh avangin chhungkaw tam takin harsatna an tawk tih tarlan a ni. Cyclone Mora siper hian thli leh ruah a ken tel avangin, hmun hrang hrangah harsatna a thlen phah a ni. Manipur-ah pawh ruahsur nasa tak avangin hmun ṭhenkhatah tui a lian a, sangha khawina dil eng emaw zat chu tuiin a chim a ni. Kangpokpi district-ah pawh chhiatna tenau a thlen a, chenna-in ṭhenkhat chu thliin a len chhia a, Konghom area-a sangha khawina hmun eng emaw zat a chim bawk. Hmarchhak hmun hrang hrangah ni eng emaw zat chhung ruah a sur tawh a ni.