Arunachal sorkarin kawngpui 4 NH-a hlangkai turin ngen

Arunachal Pradesh Deputy Chief Minister Chowna Mein chuan an state chhunga kawngpui pali-te chu Natianal High­way (NH)-a hlangkai turin sorkar laipui a ngen.

Deputy Chief Minister Chowna Mein chuan Union Minister of Road, Transport and Highways Nitin Gadkari chu Nilaini khan New Delhi-ah hmuin, state highway pali - Akajan-Likabali-Bame (km 120), Margherita- Changlang (44km), Da­porijo-Gerukamukh-Dullungmukh (125 km) leh Tezu-Chapakhowa (59 km )-te chu national highway-ah hlangkai turin a ngen a ni. Union minister Gadkari hian kumin January 31 khan Arunachal hi alo tlawh tawh a, hemi ṭum hian heng state highway-te hi national highway-ah pawmsak a lo tiam tawh a ni. Mein chuan Gadkari chu National Highway Infrastructure Development Corporation Limited (NHIDCL)-a detailed project report (DPR) thehluh a nih thuai theih nan hma lakpui turin a ngen a ni.

Nitin Gadkari chuan Aruna­chal Deputy CM ngenna anga hmalak pui a tum thu a sawi. Union minister chuan Bharatmala Programme hnuaiah East-West Industrial Highway Corridor and Frontier Highway aṭanga sum hmangin hmarchhakah inkalpawhna tur kawng tam zawk siam tuma hma lak a nih thu a sawi. Hemi atan hian ministry chuan Director Gene­ral (Road Development) kaihhruaina hnuai­ah a zirchiangtu tur committee din a nih tawh thu a sawi bawk. Arunachal-ah hian Special Accelerated Road Development Programme (SARDP)-NE hnuaiah kawngpui eng emaw zat siam a ni a, heng te hi state sorkarin a enkawl zui a ni.