Assam sorkarin College 3 University-ah hlangkai dawn

Assam-a Cotton College chu University-ah hlankai a ni a, Assam sorkar chuan state chhunga College dang pahthumte chu University-ah hlankai leh tum a nih thu a tarlang.

Assam Edu­cation Minister Himanta Biswa Sarma chuan Bar­peta-a Bajali College, La­khimpur-a Madhabdev College leh Hojai-a Sankardev College-te chu kumin August thla hian University-ah hlankai hman beisei a ni. Hemi tur hian higher education chuan thutlukna a siam tawh tih sawiin, heng collge-te hi hun rei lo teah University-ah hlankai an ni thuai dawn a ni, a ti. Sarma chuan August-a Assembly monsoon session neih hunah he mi chungchangah hian bill put luh a ni dawn tih sawiin, pass a nih ngei a beisei thu a sawi.

Hetih lai hian Cotton College chu University-a hlankai chung­changah dodalna nasa tak an tawk tih sawiin, amah ngei pawhin nawrna a tawh nasat thu a sawi. Cotton College chu state chhunga Collge hlun leh rintlak ber te zing a mi a nih vangin mi tam takin an roh em em a, University-a hlangkai tura state sorkarin thutlukna a siam pawhin mi tam takin an pawm thiam lo a ni, a ti. Hetih rual hian sorkar chu a thutluknaah a chiang tih sawiin, University-a hlankai a nih chuan kawng hrang hrangah zirlaite tan hmasawnna a thlen dawn a, kaltlangpui a ni ta a ni, a ti.

Education Minister chuan, “Cotton University chu state chhunga University ṭha ber ni tur ringawtin state sorkar chuan a beisei lo a, India ram mai ni lo South East Asia-ah pawh lang phak tur khawpin din chhoh tum a ni” a ti. Tun aṭanga kum thum a liam leh chuan he University hi South East Asia ram aṭang pawhin zirlaiten an la pan hial tur thu a sawi bawk.