Manipur-ah Cyclone Mora vangin mi 3 an thi tawh

Manipur State Government’s Relief and Disaster Management department chuan tun hnaia Cyclone Mora tleh chuan chhiatna hrang hrang a thlen thu sawiin, mi pathumin nunna an chan tawh tih a tarlang.

Cyclone Mora hian tunhnai khan ṭenawm ram Bangladesh a nuai a, a siper hian hmarchhak a nuai tel bawk. Cyclone hian ruah a ken tel avangin chhiatna thleng a tam phah hle a, hmun hrang hrangah tuilian avangin mi tam takin hatsatna an tawk mek a ni. Manipur-ah hian ruah a sur nasat avangin lui a lian nasa hle a, Thesii lui lian chuan mi pakhat nunna a la tawh. Disaster Management chuan, Churachandpur-a Lanwa luiah naupang pahnih kum thum leh kum li mi an tlahlum tih a tarlang a, an pahnih hian unau an ni. Tui tla zinga ruang pahnih hi hmuh a ni tawh a, ruang pakhat chu zawn mek a la ni. Manipur sorkar chuan nunna chan chhungte hi zángnadawmna cheng nuai 4 ṭheuh pek an nih tur thu a puang.

State sorkar chuan mipuite chu fimkhur tura chahin, District tina Deputy Commissioner-te chu chhanchhuah hna tawh a ṭul huna che chhuak nghal thei tura inpeih turin a hriattir a ni. Chief Minister Biren Singh chuan harsatna an tawh mek chungchangah sorkar mi pawimawh bakah, Relief & Disaster Management hotute chu meeting a neihpui tawh. Tuilian leh lei min avanga mipuiten ei leh barah harsatna an tawh lohna turin sorkar chuan hma a la mek bawk.

Cyclone Mora hian Manipur mai bakah hmarchhak state hrang hrangah chhiatna a thlen a, Nagalanad-ah pawh mi pahnihin an thih phah tawh bawk.