Congress party-te'n sorkar laipui thupek duhlohna lantir

Meghalaya-a Congress party-te chuan sorkar laipuiin a sa ei leh hralh sum atana bawng hman khapna dan a tih chhuah duh lohna an lantir.

Lunawilohna hi Garo Hills hmun hrang hrangah lantir a ni a, Prime Minister Narendra Modi-a kaihhruai NDA sorkar thupek chu pawm theih a nih loh thu an tarlang. Sorkar laipui thuchhuah chu ram danpuiin sakhaw hrang hrangte zalenna a pek palzutna a nih thu sawiin, Muslim leh Kristian sakhaw zuitute dikna leh chanvo rahbehsak tumna a ni, an ti. Hei hian sakhaw hrang hrang zuitute inkarah buaina a chawk chhuak thei tih sawiin, hnam ang pawha inhmelmakna thlen thei a nih thu an sawi.

Lungawilohna lantira kawng­zawhte hi mi 3,000 vel an ni a, state sports and youth affairs minister Zenith Sangma, parlia­mentary secretary-te leh sorkar mipawimawh eng emaw zatin an telpui a ni. Kawngzawh hi Congress Bhavan aṭanga ṭan a ni a, Modi-a duhlohna thuziak eng emaw zat tarlan a ni. Congress MLA Cherak Momin chuan bawng humhalh duh lohna lantirin state pumah nawrh huaihawt an tum thu sawiin, sorkar laipui thutluk­na chu sut leh ngei an phut thu a sawi. Noverfield Marak chuan vawiin hian Tura-ah 'beef party' buatsaih an tum thu a sawi bawk.

Congress party hruaitu D. Sangma chuan, sorkar laipui thuchhuak hian bawng hmanga eizawngtute a timangang hle tih sawiin, Meghalaya mai ni lo hmarchhak state dang-ah pawh khapna hi kalpui ve lo turin sorkar laipui an phut tih a sawi ve bawk.