Assam-ah LPG phurtuten tiam chin awm loin nawrh huaihawt
North East Packed LPG Transporters Association chuan nimin aṭang khan Assam-ah tiam chin awm loa nawrh an huaihawt a, Assam-a LPG bottling plant pasarih pawh nawrh huaihawtte thlawpna lantirin khar an ni.
Nimin aṭanga bottling plant kharte hi North Guwahati, Sarpara (Kamrup), Gopanari (Tinsukia), Bongaigaon, Dimapur, Silchar, leh Duliajan ami te an ni. Nawrh hi an chhunzawm zel a nih chuan Assam-ah LPG cylinder indaih lohna a thlen thuai rin a ni a, Assam bakah hmarchhak state dangte pawh a nghawng thei dawn a ni.
Assocation hruaitute chuan kum li liam ta chhungin an thil phut chungchangah meeting vawi tam tak neih ni mah se, tun thlengin tihhlawhtlin sak an la ni lo tih an sawi. IOCL thuneitute an thil phutte an ngaihsak duh loh avangin nawrh huaihawt lo thei loin an awm ta tih an sawi a, hei vanga cosumer-te harsatna tawk a, LPG cylinder indaih lohna a thleng a nih chuan pawi an ti hle tih an sawi.
Assam food and civil supplies minister Ranjeet Kumar Dass hnenah pawh ziakin nawrh an huaihawt tum thu hi an hrilh tawh bawk.
Minister hnena lehkha an thawnah, "Indian Oil Corporation thuneitu chuan union petroleum ministry office aṭanga hriattir a nih angin LPG cylinder phurh tur chungchanga tender hmasa chu a cancel a ni. Hemi hnu hian IOCL thuneitute chuan kan harsatna sutkian dan ngaihtuahin vawi tam tak meeting min neihpui tawh bawk. Mahse kan buaina ber chu chingfel si loin, LPG bottling plant hrang hrang tan tender thar a tichhuak leh si a, hei vang hian lungawi lohna kan lantir a ngai ta a ni," tiin an tarlang. LPG cylinder phurhna man chu kum 2014 aṭang khan IOCL lam hian an la ennawn sak leh lo niin an sawi bawk.
July 14 khan association hian IOCL hnenah tender thar an tihchhuah chu cancel turin an ngen a, mahse tun thlengin IOCL lam hian an ngenna hi a la tihlawhtling duh lo tih an sawi.
Assam-ah hian LPG bottling plant pakua a awm a, pahnih erawh hman theih lohin an awm mek. Heng hmun aṭang hian cylinder hi ni tin nuai hnih vel an phurchhuak ṭhin.