Manipur Legislative Assembly session nei ṭan

12th Manipur State Legislative Assembly session vawi hnihna chu nimin aṭang khan neih ṭan a ni a, August 5 thleng a awh ang.

Session chhung hian rorel inkhawm ṭum 11 neih a ni dawn a, ṭum danga an la tih ngai loh angin tun ṭum session-ah hian Inrinni-ah pawh rorel inkhawm hi an nei dawn a ni. Budget estimate 2022-23 sawiho a ni dawn a, demands for excess grant chungchang pawh sawihoa vote lak a ni ang.

Vawiinah Manipur Appropriate (No. 3) Bill 2022 leh Manipur Appropriate (no.5) Bill 2022 te pharh a ni dawn a, sorkar department hrang hrang tana demands for grant 2022-23 chu naktuk aṭangin sawihoin vote an la nghal dawn bawk.

March 21-a chief minister term hnihna atana N Biren Singh lakluh a nih hnuah, hemi thla vek hian 12th Manipur Legislative Assembly session hmasa ber chu neih nghal a ni.