Guwahati-a ruihhlo tawlhtu Manipur police constable man

Assam police-te chuan Pathianni khan Manipur aṭanga ruihhlo, Yaba tablet nuai khat, Rs vbc 20 hu tawlhtu mi pahnih chu Guwahati-a Koinadhara area-ah an man. Ruihhlo neitu pakhat zawk hi Manipur police-a constable ṭang lai a ni.

An thu dawn bawhzuiin, East Guwahati Police District (EGPD) chuan Manipur aṭanga rawn kal, Tata Nexon car chu an lo ti ding a, an endik hnuah Yaba tablet tam tham tak hi an man a ni. Ruihtheih thil kengtu mi pahnih, Thangkhogin Haokip leh Letminching Haokip te an man nghal a, Thangkhogin hi police constable a ni.

Joint commissioner of police, Guwahati, Partha Sarathi Mahanta chuan , Yaba tablet-te hi Manipur-a Moreh aṭanga rawn ken niin, Guwahati kaltlangin Bengaluru-ah tawlh an tum tih a sawi. An mi man zinga pakhat chu Manipur police-ah kum li ṭang tawh a ni tih sawiin, tourist anga inlanin Assam-ah hian an lut tih a sawi. Yaba hi methamphetamine leh caffeine inpawlh a ni a, Southeast leh East Asia lamah an siamchhuak nasa a ni.

Pathianni vêk han Assam police-te chuan Karbi Anglong district-a Dilai-ah heroin, Rs vbc 2 hu leh a neitu an man bawk. Police-te chuan he ruihhlo hi Dimapur, Nagaland aṭanga rawn phurh luh a nih thu an sawi.