Assam-a tuilianin mi 13,000 chuang a nghawng

Assam-a tuilian chuan mi 13,000 vel zet a nghawng tawh a, leimin avangin hmun hrang hrangah inkalpawhna a buai phah bawk.

Assam State Disaster Manage­ment Authority official-te chuan tuilian hian Lakhimpur, Jorhat leh Biswanath district-te a ngawng na zual tih sawiin, chhungkaw tam tak chuan himna zawngin an in leh lo an chhuahsan tih an sawi. Heng mite hi an chen lailawkna tur ruahman sak an ni a, state sorkar chuan kawng hrang hrangin chhawmdawl hna a thawk a ni. Northeast Frontier Railway (NFR) offical-te chuan tui lian leh leimin avang hian Barak Valley region-ah rel tlan dan tih danglam a nih thu an sawi. Dima Hasao district leh Barak Valley inkara rel tla chu tihtawp lai lawk a ni a, Silchar leh Lumding inkara tlan pawh kar kalta Inrinni aṭang khan tihtawp a ni.

Brahmaputra lui hian a kianga chengte chu kum tin harsatna a lo theln tawh ṭhin a, kumin pawh mi tam takin harsatna an tawk leh ṭan mek a ni. Nimatighat-ah chuan Brahmaputra lui hian hlauhawm chhinchiahna a pel tawh a, ruah a sur zel chuan harsatna nasa zawk a thleng thei dawn a ni. Tuilian avang hian lawng hmanga inkalpawhna thenkhat pawh tihtawp lai lawk a ni a, thliarkara awm Majuli aṭanga Jorhat pawh lawng hmanga inkalpawh theih lohin a awm mek a ni. Assam sorkar chuan tuilian avanga harsatna tawk te chhawmdawl hna a thawk nghal a, chen lailawkna tur puan-in ṭhahnem tak siam a ni tawh. Tuailian tuarte ṭanpui hna hi army leh State Disaster Rescue Force (SDRF)-te'n an thawk a, eitur sem chhuah hna kalpui reng a ni bawk.

Assam sorkar hian tuilian tuarte chhawmdawl hna thawk­tute tan training a buatsaih sak a, tun hnai khan Morigaon district-ah hemi pual hian "Megh Rahat” buatsaih a ni bawk.