Assam CM-in Tripura-ah MODI Fest a hawng
Assam Chief Minister Sarbananda Sonowal chuan kar kalta Inrinni khan Tripura-ah MODI (Making of Developed India) festival a hawng a, festival hian ni thum chhung a awh.
Assam CM hi BJP Tripura unit President Biplab Kumar Deb leh hruaitu dang ten an ṭawiawm a ni. Festival neih chhung hian certral-a BJP kaihhruai NDA sorkar-in hmasawnna hna a thawh hrang hrangte tarlan a ni a, scheme hrang hrang tarlan a ni. MODI fest chhung hian scheme hrang hrang - Digidhan Yojana, Krishi Samridhi Yojana, Mahila Sashatikaran Yojana leh Kaushal Vikas Yojana-te inhrilhhriatna hun hman a ni bawk.
Hetih lai hian rorel lai Communist Party of India-Marxist (CPI-M) chuan MODI Festival buatsaih hi an sawisel a, BJP chu uchuak taka cheah an puh. Hei bakah hian tun hnaia Oil and Natural Gas Corporation (ONGC)-in Tripura BJP President Biplab Kumar Deb hnana festival buatsaih nana cheng nuai 15 a pe chu an dem thu an sawi bawk.