NDA sorkar hnuah hmarchhakin hma a sawn : Assam CM

Assam Chief Minister Sarbananda Sonowal chuan Central-a Bharatiya Janata Party (BJP) kaihhruai Natio­nal Democratic Alliance (NDA) sorkar a din hnuah hmarchhakin nasa takin hma a sawn niin a sawi.

Assam CM chuan he thu hi Tripura khawpui Agartala-a MODI (Making of Developed India) festival hawnnaah sawi­in, NDA sorkar a din hma­in hmarchhak chuan ngaih pawimawh a hlawh tawk lo a, kawng hrang hrangah hlamchhiah a ni, a ti. Kum 2014-a BJP-in thuneihna a chan aṭangin hmarchhak chuan ngaihven a hlawh chhoh bakah, kawng hrang hrangin hmasawnna kalpui a ni, a ti. Prime Minister Narendra Modi-a kaihhruai sorkar chuan hmarchhak hmasawnna a ngai pawimawh em em a, hma sawn zela turin ruahmnna eng emaw zat a duang a ni, a ti.

Sonowal chuan Assam-ah hun rei tak chhung Congress party-in thuneihna an chan chhungin hmasawnna liam tham hmuh tur a awm lo tih sawiin, BJP sorkar a din hnuah erawh zirna, hriselna leh kawng hrangah hmasawnna hmuh theiha a awm thu a sawi. Assam CM chuan Tripura-in nakkuma assembly election a hmachhawn hunah BJP chuan hnehna an chan a beisei tih sawiin, state mipuite chu hmasawnna hna thawk thei tura BJP sorkar din turin a sawm. Tripura-ah hian Mahat­ma Gandhi National Rural Employment Guarantee Act scheme hnuaiah eirukna a nasa hle niin a sawi bawk.