Assam-a buaina thlengah naupang pakhat thi

Assam-a National Highway (NH)-37 ah kar kalta Inrinni khan buaina a chhuak a, naupang pakhat a thih bakah police eng emaw zatin hliam an tuar.

Police-te chuan kar kalta Zirtawpni khan NH-ah hian school naupang kum riat mi chu truck-in a chilhlum tih an sawi a, heta ṭang hian buaina hi a inṭan tih an sawi. Tualchhung mi lungawilote chuan NH hi an dangchat a, naupuang ruang hi hun eng emaw chen kawngpuiah hian a awm a ni. Police-te chuan thil thlenna hmun hi an pan nghal a, mipui lungawilote chuan police-te hi lo beiin, lirthei eng emaw zat hal a ni. Police-te chuan mipui hnawhdarh nan hian tear gas an hmang a, vanlam hawia silai hmehpuah a nih bakah, rubber bullet pawh hman a ni. Mipui lungawi lote hian police-te hi an tawng let a, OC Hantse, Assistant Sub Inspector Sajal Purkaystha, ASI Rafiqueuddin leh midang eng emaw zatin hliam an tuar a, Silchar Medical College Hospital (SMCH)-ah dahluh an ni.

Police-te chuan tualchhung mi ṭhen­khat chu meeting neihpui an nih hnuah buaina hi an chingfel thei tih an sawi. He thil thlengah hian mi 21 man an ni a, heng mite hi tualchhung mite chuan chhuah tura an phut bakah, naupang thi chhungte hnenah zángnadawmna pek an phut a ni. He thil thleng avang hian NH 37 Silchar-Imphal chu khar lailawk a ni bawk.