Sikkim hi state ṭha ber zinga mi a ni : Vijay Goel

Union Minister of State for Youth Affairs and Sports Vijay Goel chuan Sikkim chu ram chhunga state ṭha ber zinga mi a nih thu a sawi.

Union Minister Goel hian Pathianni khan Sikkim-a NYK, NCC leh NSS volunteer-te State level youth convention neih a hmanpui a, he thu hi a sawi a ni. Sikkim-in hmasawnna hrang hrang a neih te chu chu chhuahawm a tih thu sawiin, state sorkar hnathawhte chu a namai lo hle a ni,a ti. Ni hnih lek a cham chhungin hmasawnna hna thawh hrang hrangte a hmuh chuan a tihhlim hle tih sawiin, India rama state hmasawn ber leh ṭha ber te zinga mi a nih tih a sawi ngam thu a sawi.

Goel chuan Sikkim chu state fai tak a nih thu sawiin, thingtlang leh khawpui a fai em em a, lirthei horn bengchheng hriat tur a awm lo a, hetiang hi state dangah hmuh tur a van tawh thu Union Minister chuan a sawi. Sikkim-in sports lamah hma a sawn zel theihna turin ṭanpui a inhuam thu sawiin, state-in infiammi a neih ṭhat te chu kawng hrang hranga puih a inhuam thu a sawi. Sports Authority of India leh Sports Ministry aṭanga hamṭhatna awm thei angte ngaihtuah sak a inhuam thu a sawi bawk.

Chief Minister Pawan Cham­ling-a kaihhruai sorkar hnathawh leh hmalakna te chu sorkar laipuiin a hriatsak tih Sports Minister Vijay Goel chuan sawiin, a hna thawh ṭhat avangin duhsakna pawh a a dawng mek zel tih a sawi. Kumin October-a ni thum awh tur North East Level Youth Convention neih turah pawh telpui leh ngei a tum thu sawiin, Sikkim chu nuam a ti hle tih a sawi. Union Minister hi state sports minister R.B. Subba leh sorkar mi pawimawh eng emaw zatin an ṭawiawm a ni.