Meghalaya : Congress-in state BJP Vice President chungchang chhui chian phut

Meghalaya Congress chuan state BJP vice president Bernard Marak chu a farmhouse, Tura-a thil dik lo tak tih ṭhin nia sawi chungchanga chhui chian an phut tih an sawi.

July 22 khan Tura, Barak-a Rimpu Bagan Farmhouse chu Tura police-ten dapin, he hmunah hian dan phal loh thil kalpui nia sawi a ni. Farmhouse-ah hian mi 73 an lo awm a, an zinga 26 chu hmeichhia niin, kumtling lo naupang panga (mipa naupang pali leh hmeichhe naupang pakhat) an lo awm bawk. Naupangte hi District Child Protection Officer (DCPO) kutah hlan an ni. Police-te hian motor chhungah, thawmhnaw pawh inbel loa lo awm an man tel bawk a, hei bakah hian zu tam tham tak, condom 500 leh sorkar phal loh hmanraw dang eng emaw zat an man tel bawk.

Tura khaw daia BJP hruaitu farmhouse hi nawhchizawrhna hmun atana hmanga puh a ni a, mahse Marak chuan an puhna hi phain, chief minister Conrad K Sangma-a'n tihchhiat tuma a phiarna niin a puh a ni.

Police-ten Marak hi man tuma an zawn laiin Guwahati lamah a tlanchhia a, hemi hnu Inrinni liam ta khan Delhi lamah a kal leh a ni.

West Garo Hills Superintendent of Police Vivekanand Singh chuan Bernard Marak hi kum 2000 chho vel aṭang khan criminal case 25 vel a nei tawh niin a sawi. Marak hi politics a luh hmain, helpawl ṭhiah tak Achik Nationalist Voluntary Council (B)-ah self-styled chairman a ni ṭhin. An pawl hi ṭhiah a nih hnuah pawh dan kalha sumdawnna thilah a la inhnamhnawih fo nia sawi a ni bawk.

Hetih lai hian state BJP president Ernest Mawrie chuan a thawhpui Marak thlavang hi hauhin, a farmhouse dap sak a nih dan chu politics thila inbeihna niin a sawi. Marak hi dik lo taka phiar a ni, a ti. Meghalaya sorkar chu Marak laka thubuai a siamte sut vek tura phutin, hei hi politics thil vanga siamsak leh, BJP hming tihchhiat an tumna vang niin a puh a ni.

Congress party chuan rorellai, Meghalaya Democratic Alliance (MDA)-a tel, BJP hruaitu farmhouse-a thil thleng chungchangah MDA chhunga thil inthup tam tak a awm nia a lan thu a sawi. MDA sorkar chu eirukna chungchangah a hmingchhiat lai mekin, Marak-a farmhouse dap a ni a, hei hi kum nga kalta chhunga sorkar thil tih dik lote thup tumna niin a puh.