Sikkim-a tourism industry dinhmun ziaawm ṭan

Sikkim state-in sum a lakluhna hnar pawimawh tak pakhat, tourism industry chu Covid-19 hri leng vanga hun rei tak hrekbeh a nih hnuah an dinhmun a ziaawm chho ṭan.

Official-te chuan nikum October leh kumin March thla inkar khan an state tlawhtu hi mi nuai 3.08 vel an awm leh tawh tih sawiin, January thla bikah khan khualzin 98,456 in Sikkim hi an tlawh a ni.

Tourism department official chuan, "Hri leng vanga lockdown puan leh, khuahkhirhna dang siamte sorkarin a hlih hnuah, tourism industry pawh a rawn ṭhang chho veleh a, ram chhung hmun hrang hrang aṭangin khualzin pawh an pung chho leh ṭan a ni," a ti. Ram pawn lam aṭanga zin, foreign tourist erawh an la pung nasa lo a, mi 6,055 vel chauh an la ni tih a sawi nghal bawk.

Hri len hma, kum 2019 khan Sikkim tlawhtu khualzin hi mi nuai 16 an tling. Official-te chuan boruak a pangngai chhoh zel chuan thla reiloteah khualzin pawh hi an pun chhoh zel an beisei tih an sawi.

Sikkim-a tualchhung mi 75% dawn hi an eizawnna kawngah direct leh indirect-in tourism industry-ah an in nghat a ni. Covid-19 hri leng vanga tourism industry hna thawk thei loa hun rei tak a awm chhung khan Sikkim unemployment rate pawh a sang chho hman hle. Covid-19 hri leng tuar nasa ber zingah tour operator, hotel neitu, sumdawng, vendor leh taxi driver-te an tel a ni. Hri leng vanga khuahkhirhna siam chhung khan tourism industry hian Rs vbc 600 - 700 vel a hloh nia chhut a ni.