Manipur sorkarin Irom-a nu leh pate venhimna pe

Manipur sorkar chuan kum 2011-a kahhlum Irom Rojer-a nu leh pate chu chhun zan zawmin venhimna ṭha tak pek an nih thu Supreme Court (SC) a hriattir. SC chuan hemi chungchangah hian Mani-pur sorkar chu hriattirna pe turin a ti a, Thawhṭanni khan venhimna pek an nih thu hi Court a hrilh a ni.

Rojer hi tuna Manipur chief minister ni ta, N. Biren Singh-a fapa Ajay Meetai nen motor inpelh an tumna lamah intithiam loin, Meetai zawk hian silai-in Rojer hi a kaphlum a ni. He thil hi March 20, 2011-a thleng kha a ni a, hetih hun lai hian Biren Singh hi Okram Ibobi Singh-a kaihhruai Congress sorkarah Sports Minister a ni. He thil thleng chungchangah hian Rojer-a nu leh pate chuan vauna an tawh avangin thubuai an ziak lut ngam lo nia sawi a ni a, a hnuah an laina hnaite chuan thubuai an thehluh sak a ni.

Court thupek hi Rojer-a nu leh pa Irom Chitra Devi leh Irom Lokendra Singh-te himna tura tih a ni. Irom Chitra Devi leh Irom Lokendra Singh-te hian an himna zawngin an in leh lo an chhuahsan a, New Delhi-ah an cheng a ni. Hemi chungchangah hian an ukil chu SC-ah a zualko a, kumin May 22 khan Supreme Court hian sorkar laipui leh Manipur sorkar-te chu Rojer-a nu leh pate venhimna pek an nih loh chhanah insawifiah turin a hriattir a ni.

Sorkar aiawh hian Additional Solicitor General Maninder Singh chu June 3 khan sorkar aiawhin court-ah a inlan a, venhimna ṭha tak pek an nih thu hi a sawi a ni. Ajay Meetai hi tun hnai khan kum nga lung-in tang tur leh cheng nuai 10 chawi turin Court chuan a chungthu a lo rel sak tawh. Apex court chuan May 30 khan sorkar laipui chu Irom-a nu leh pate venhimna pe turin a lo hriattir tawh a, venhimna pek an duh a nih chuan pek an ni ngei tur a ni, a ti.

Hetih lai hian All Manipur Bar Association leh Manipur High Court Bar Association-te chuan Irom-a nu leh pate hian Court-a zualko an tum lo hrim hrim niin an sawi.