Infrastructure lamah hma lak chhun- zawm zel a ni ang : DoNER Minister

Development of North Eastern Region (DoNER) minister Jitendra Singh chuan hmarchhakin infrustruction lama hma a sawn zel theih nan, hmalak chhunzawm zel a nih tur thu a sawi.

DoNER Minister chuan Assam leh Aru­nachal inkalpawhna tura lei dawh chu China chuan a ngaimawh hle tih a sawi a, hemirual hian infrustructure lama hmalakna chu kalpui zel a nih tur thu a sawi. Ram himna turin hmalakna kalpui zel a ni dawn a, tawpsan tumna a awm lo a ni, a ti. China chu Arunachal chungchanga inrawlh nasa lutukah puhin, tun hnaia Dalai Lama'n AP a tlawh chungchangah China chetdan chu a dem thu a sawi. China chuan kawng hrang hrangin India sorkar hmalakna te dodal mah se, hmarchhaka infrastructure tihchang­tlun hna chu chhunzawm zel a ni ang, a ti.

Assam - Arunachal in­kalpawhna Dhola-Sadiya Bridge hi km 9.15-a sei niin, ram chhunga lei sei ber a ni. Prime Minister Narendra Modi chuan May 26 khan lei hi a hawng a, hawn a nih hnu lawkah China chuan India sorkar chetdan a dem thu a sawi lang a ni. Chinese Foreign Ministry chuan ram pahnihten ramri chungchanga harsatna an tawh mek laia India chetdan chu a dem thu a sawi. Arunachal chung­changah China chu a din­na ngaiah a ding reng tih sawiin, a ram bung pakhat a nih thu a sawi bawk.

Hetih lai hian DoNER Minister chuan China vauna avang hian hma­lakna a ṭhuanawp tur a ni lo a, hmarchhakin infrustructure lamah hma a sawn zel theih na turin hna thawh a ni zel dawn a ni, a ti. DONER Ministry hmalakna chu sorkar laipuiin a thlawp ṭha hle tih sawiin, hmarchhak hmun hrang hrangah chak taka hmalakna kalpui mek a ni, a ti. Singh chuan Aruanchal-ah airport din tura ruahman a nih thu sawiin, a hmun tur pawh thlithlai mek a ni. Sikkim-a airport din thar pawh hawn mai theiha peihfel a ni tawh tih a sawi bawk.

Jitendra Singh chuan chuan hmarchhak chu hun rei tak chhung ngaihthah alo ni tawh tih sawiin, BJP kaihhruai sorkar a din hnuah erawh hmarchhakin nasa taka hma a sawn thu a sawi. Sorkar laipuiin Act East Policy a kalpui mek chu hmarchhak hmasawnna tur a nih thu sawiin, sorkar hmalakna te thlawp zel turin hmarchhak mipuite a sawm bawk.