2018-ah chuan ziak leh chhiar thiam 100% kan ni tawh ang : Sikkim CM

Sikkim Chief Minister Pawan Chamling chuan kum 2018 kum tawpah chuan an state-a ziak leh chhiar thiam awm zat chu 100% a nih a beisei thu a sawi.

He thu hi Union Minister of State for Sports and Youth Affairs Vijay Goel nena Pathianni-a a chenna, Mintokgang-a an inkawmnaah a sawi a, a kaihhruai sorkar chuan zirna tihhmasawnna kawngah nasa taka hma a lak thu a sawi. Chamling chuan Union Minister chu an state a tlawh avanga lawmthu hrilhin, Sikkim-in hmasawnna tur ruhrel a din mek te tihhlawhtlin kawngah hma lak pui turin a ngen. A bikin zirna lama hmasawnna chu an ngaih pawimawh a nih thu sawiin, kum 2018-ah chuan state mipuite chu ziak leh chhiar thiam tir vek tuma hma an lak thu a hrilh. Hemi tihlawhtling tur hian hma an lak mek thu leh, tihhlawhtlin ngei an tum thu a sawi bawk.

Union Minister chuan Sikkim-in ziak leh chhiar thiam tam lama dinhmun sang tak a hauh thei chu lawmawm a tih thu sawiin, he dinhmun thleng thei tura state sorkar hmalakna chu ropui a tih thu a sawi ve bawk. Sikkim chu ramri depa awm ni mah se state ralmuang tak a nih thu a sawi a, a mi chengte pawh an hlim hlea a hriat thu a sawi. Chamlinga kaihhruai sorkarin ziak leh chhiar thiam tam lama 100% ni thei tura an hmalakna te chu a theih anga pui a inhuam thu a sawi bawk.