Manipur Assembly-in GST Bill pass ve leh
Manipur Assembly chuan Thawhṭanni khan Manipur Goods and Services Tax Bill, 2017 chu a pass ve leh ta. GST Bill hi July 1 aṭanga hman ṭan tura tih a ni a, state hrang hrangin an pass tawh a ni.
Finance changtu Deputy Chief Minister, Y. Joykumar Singh chuan Bill hi pharhin, sawiho a nih hnuah lungrual taka pass a ni. Joykumar Singh chuan GST Bill pass a ni ta chu lawmawm a tih thu sawiin, state sorkarin kawng tam takah hma a sawnpui ngei a beisei tih a sawi. Hetihrual hian Manipur Goods and Services Tax Bill 2017 hian zu aṭanga chhiah lak a huam dawn lo niin a sawi. Dawr nei zawng zawngte chu an in register a ngai dawn tih sawiin, hei hian mi nuai 10 vel a nghawng dawn a ni. Chief Minister N. Biren Singh chuan GST hnuaiah hian kum khat chhungin state sorkar chuan chhiah aṭangin cheng vaibelchhe 150 - 200 a hmuh theih beisei a ni, a ti.
Session-ah hian Manipur Legal Services Authority leh National Human Rights Commission annual report ngaihthlak a ni a, Joint Electricity Regulatory Commission for Manipur and Mizoram regulations 2016 leh corrigendum of Joint Electricity Regulatory Commission for Manipur and Mizoram-te chu House-ah hian pharh a ni bawk.