Meghalaya-in Entry point-te khar vek dawn

Meghalaya sorkar chuan July 24-31 chhungin an state-a entry point zawng zawng khar a ni dawn tih a sawi. 

Entry point hi Byrnihat, Rata­chera, Bajengdoba, Tikrikila, Mir Jumla leh Haldiaganj hmunah siam an ni. Deputy chief minister Prestone Tysong chuan July 24-31 chhung heng entry point-te hi emergency service, essentian commodities leh Assam aṭanga motor lut leh chhuak tur tan chauh hawn a ni dawn tih a sawi. Tynson chuan an state-a lutte hri laka an him leh him loh endik hna thawktu, health department leh frontline worker-te chu thla eng emaw zat rim taka thawkin an hah tawh hle tih a sawi a, hei vang hian chawlh hahdamna hun siam a, hemi chhunga workshop-te neih a nih zawk tur thu a sawi. 

Entry point khar chhunga an state-a haw tumte pawh an haw hun tur sawn turin a ngen a, hri leng laka an  himna tura sorkar hmalakna hrang hrangte chu thawhpui turin mipuite a sawm bawk.