Meghalaya BJP hruaituin party chhuahsan ve leh

Meghalaya-a Bharatiya Janata Party (BJP) hruaitu pakhat chuan sorkar laipuiin bawng chungchanga khapna a tih chhuah duh lohna lantirin party a chhuahsan ve leh.

North Garo Hills District-a BJP president Bachu Marak chuan party a chhuahsan chhan sawiin, BJP kaihhruai NDA sorkar-in bawng humhalh nana rampuma hman tur dan a siam chu a pawm thei lo tih sawiin, hei hian ram mipui tam tak eizawnna a nghawng thei a ni, a ti. He khapna hian Meghalaya mipuite a ngawng na hle tih sawiin, a bik takin bawng hmanga eizawng leh a sa eitute tan harsatna a thlen tih a sawi. Thupek duh lohna hi vawi tam lantir ni tawh mah se, sorkar laipuiin a thu a sut loh avangin banna athehlut ta a nih thu a sawi.

Meghalaya-ah hian sorkar laipui thutlukna duh lohna lantirin vawi eng emaw zat nawrh huaihawt a lo ni tawh a, West Garo Hills BJP president Bernard Marak pawhin party a lo chhuah san tawh a ni. Party hruaitu pahnihte chuan khapna dan hian state mipuite tan harsatna a thlen avangin kaltlangpui chi a ni lo tih an sawi a, sorkar laipui chu thutlukna lo siam tawh sut leh turin an phut tih an sawi. Hetih lai hian State BJP President Shibun Lyngdoh chuan hruaitu pahnih ban chungcgangah hian thuchhuah a la siam lo thung. Vice President John Antonius Lyngdoh chuan sorkar laipui thu tlukna siam hi an pawm lo tih a sawi ve bawk.