Assam HM in Central Jail dinhmun enfiah

Assam-a Guwahati Central Jail-ah Covid-19 kai an pun belh zel avangin Nilaini khan health minister Himanta Biswa Sarma chuan tlawhin, an dinhmunte a enfiah. 

Assam-a jail hrang hranga tang zinga coronavirus kai hmuh chhuah tawh hi mi 210 an awm tawh a, an zinga mi 185 chu Guwahati Central Jail-a tang mekte an ni. Assam police zingah hri kai 608 hmuh an ni tawh bawk a, an zinga

mi 272 chu enkawl dam an ni tawh. 

Guwahati Central Jail-a tangte hian Covid-19 leng mek karah jail chhunga healthcare facility leh ei turte ti ṭha turin an phut a, jail tang mi 1,200 chuangte chuan an thil phut nawrna atana hian ni hnih chhung chaw an lo nghei tawh a ni. Tang zinga ṭhenkhat chuan jail chhunga hri kai hmuh ni mah se, hri darh tur venna atana ruahmanna siam a ni lo tih sawiin, jail tang zinga 95% vel chuan he hri an kai an rin tawh thu an sawi a ni. 

Assam-ah hian hri kai an la pung chak chhunzawm zel. Nilainia hri kai hmuh thar mi 1088 zingah, Guwahati khawpuia mi 649 an tel leh a ni. Hri kai hmuh chhuah tawh hi mi 19,754 an tling tawh a ni. Hri kai an pun chak avangin Guwahati khawpuiah total lockdown kalpui mek ni mah se, ni thum chhung chu khawpui chhunga hri kai hmuh thar hi nitin mi 500 an chuang ziah a ni. 

Nilaini zan khan Sarma chuan an state-a hri kai zinga pahnihin an thihpui leh tih sawiin, he hri vanga thi hi mi 48 an awm tawh. Hetih lai hian hri kai enkawl dam hi mi 12,888 an awm tawh thung.