APSC Scam : India President-in SC thu ngaichang
India President Pranab Mukherjee chuan Assam Public Service Commission (APSC) chairman suspend lai mek Rakesh Paul-a ban a nih leh nih dawn loh chungchangah Supreme Court (SC) thu a ngaichang.
Hemi chungchangah hian President aiawhin June 3 khan Joint Secretary of the Government of India, Gyanendra Dev Tripathi chuan Court-ah lehkha a thehlut a, APSC chairman ban chu ram danpui Article 317-ah thil theih a ni em tih chungchang a zawt a ni. Special prosecutor BIjan Mahajan chuan Article 317 hnuaiah hian president hian public service commission member leh chairman ban turin thuneihna a nei tih a sawi a, mahse hei hi SC leh sorkar laipui hriatpui a ni tur a ni, a ti. Supreme Court chuan hemi chungchangah hian sorkar laipui hriatpuiin President Office chu hriattirna a pe ve leh dawn a ni.
Hetih lai hian Assam police-te chuan APSC hnuaia thamna sum lak thubuaiah hian official 37-te chu an inrawlh tih an puang. Thubuai siam sak zingah hian Assam Civil Service (ACS) offical 25 leh leh Assam Police Service (APS) official tel an ni. Heng official-te hi APSC hnuaia hna lakah dik lo taka thamna sum lak thubuaiah inhnamhnawiha puh an ni. He case hi Dibrugarh police-te chuan an chhui a, tun hnai khan Assam sorkarah report hi an thehlut a ni.
Kum 2014 khan APSC hnuaia exam-ah candidate zinga ṭhenkhat chuan offical-te chu thamna sum tam tak an pe nia tarlan a ni a, thamna sum lak chungchangah APSC chairman Paul pawh suspend a lo ni tawh. He thilah hian APSC member bakah politician eng emaw zat an inrawlh nia sawi a ni bawk. Dibrugarh police te'n official 37-te hming a tarlan hi June 9 hian thu zawhfiah an ni ang. Tun hnai khan police-te chuan exam paper 990 zet an lakhawm a, hengte hi APSC strong room aṭanga an hmuh a ni.He thilah hian ACS officer pathum man an ni tawh. Circle officer Bhaskar Jyoti Devasarma, Bhaskar Dutta leh Amit Sarma-te chu judicial custody-ah dah mek an ni a, Rakesh Kumar Paul-a thurualpuiah puh an ni bawk.