NEC fund-te education sector tan kan hmang vek dawn : Sikkim CM

Sikkim chief minister Prem Singh Golay chuan North East Council aṭanga fund an dawn zawng zawng chu education sector tan hman vek a ni dawn tih a sawi. Nilainia 'Students Rights Day' a hmanpuinaah, CM chuan an state-a education sector thuam chak a ngaih thute a sawi a, hemi atan hian sorkar chuan theihtawp chhuah a tum tih a sawi a ni.  Hemi hma hian Lok Sabha MP Indra Hang Subba chuan MP Local Area Development Fund chu state chhunga school tihchangtlunna atana hman a nih tur thu a lo sawi tawh bawk a ni. 

CM chuan NEC fund an dawnte chu university leh college-te harsatna sutkian leh tichangtlunna atan hman a ni dawn tih a sawi a, kum 2019-20 budget-ah zirna lam chawikanna tura an lo tiam hrang hrang tihpuitlin theih tak lohte thawh chhunzawmna tur chu 2020-21 budget-ah telh leh a ni tih a sawi. Hri leng avangin hna thawh theih a ni rih lo tih a sawi a, mahse sorkar chuan education sector chu a dah pawimawh hle a ni, a ti.