Hmarchhak state-te hi zin mite paradise a ni : Vice President

India vice president M Venkaiah Naidu chuan zin vah nuamti tan chuan hmarchhak bial chu tlawh ngei tur a ni tia sawiin, zin mite paradise a ni, a ti.

Vice President hian Thawhlehnia ‘North East on Wheels’ expedition-a telte nena hun an hmanah he thu hi a sawi a ni. He expedition-ah hian ram chhung state 18 aṭangin biker 75 an tel a, an zingah hian hmeichhia panga an awm ve bawk. Biker-te hian hmarchhak state pariatte an tlawh kual a ni.

Naidu chuan zin vah nuamti tan chuan hmarchhak bial chu tlawh ngei turin a ti a, hmarchhak bial mawina leh, culture hrang hrang awmte chu a taka hmu a, tawng ve ngei turin a chah. Hemi rual hian hmarchhak bikah tourism chu thuam chak zel a ṭul thu leh, mipuite intlawh tawnna awm ṭhin chuan ram inpumkhatna leh lungrualna pawh a tihnghet zel tur thu a sawi bawk.

Mipuite chu ram pawn lama zinchhuah aiin, ram chhung hmun hrang hrangte fang a, tlawh chhuah ngai pawimawh hmasa turin a chah bawk a ni.

Hmarchhak state hrang hrang a tlawh chungchang pawh sawichhuakin, Naidu chuan ram hmelhmang mawi tak tak, culture hausa tak leh mipuite hawihhawmnate chu ropui a tih thu sawiin, 'Hmarchhak state-te hi zin mite paradise dik tak a ni," a ti. Hetih laia mi tam takin hmarchhak chanchin leh an pawimawhnate an la hre mumal lo chu pawi a tih thu a sawi nghal bawk.