NSCN-IM in inremna siamna tur RSS vangin a khawtlai niin sawi

National Socialist Council of Nagaland-Isak-Muivah (NSCN-IM) chuan sorkar laipui nena Naga political issue-a inremna zawnga inbiakna an neihah, Naga tana flag leh constitution an phut chu Rashtriya Swayamsevak Sangh (RSS) hoin an duh loh vangin tun thlengin inremna an la siam theih loh phah niin an sawi.

NSCN-IM chuan an thil phut pahnih hi kum 2015-a sorkar laipui nena Framework Agreement (FA) an ziahah pawh an tifel vek tawh a, FA hi prime minister Narendra Modi awm lai ngeiin an ziak niin an sawi bawk.

Thuchhuah an siamah NSCN-IM chuan,"Flag leh constitution chungchang hi hun eng emaw chen liamtaah sawifel vek a nih tawh hnuin, RSS rawn langin an rawn sawisel leh ta a ni. RSS/Hindutva manifesto nen a inmil theih dawn loh avangin tun thlengin inremna tihfelna tur hi tikhawtlai a ni ta a ni," an ti.