Sikkim-in MLA hluite chawimawi

Sikkim Legislative Assembly term hmasa ber leh a dawttu-a legislator lo ni tawh, la damte chawimawina hlan an ni.

State assembly term hmasa ber (1975-79)-a MLA zingah hian dam pathum an la awm a, anni bakah term hnihna (1981-84)-a legislator pakuate hnenah Former Legislators’ Federation of Sikkim foundation day lawmnaah chawimawina hi hlan an ni. Rajya Sabha leh Lok Sabha member hlui pali pawh chawimawina thuziak hi an hlan tel bawk.

Legislator hlui chawimawina hlanna inkhawm buatsaihah hian chief minister Prem Singh Golay chu khuallian a ni a, minister leh MLA-te pawh an tel ṭha hle. Golay chuan MLA leh MP hlui zawng zawngte nena hun an hmangho thei chu thil chhinchhiah tlak tak a nih thu a sawi.

CM chuan legislator hlui, an hun laia state leh an bial tana theihtawp lo chhuah tawhte zahna hlanna tur buatsaih a nih thu sawiin, an party awmna leh an hnathawh dante in ang lo mah se, tuna an state dinhmun thleng tur hian an theih ang tawkin hna an lo thawk a ni, a ti. Golay chuan MLA hluite tan hian kumtin state budget-ah grant-in-aid Rs nuai 10 dah a ni dawn tih sawiin, hei hi an association kaltlangin damdawi lama an inenkawlna leh thil dangah an hmang thei dawn a ni, a ti.