Assam-ah Japanese Encephalitis vei 8 awm belh

Assam-ah Thawhlehni khan Japanese Encephalitis (JE) vei mi pariat hmuh belh an ni a, hemi ni vek hian mi paliin an thihpui tawh. JE thihpui hi mi 44 an awm tawh a ni.

National Health Mission, Assam-in a tarlan danin, JE vei hmuh tharte hi Nagaon district-ah pathum, Tinsukia-ah pahnih, Chirang, Jorhat leh Kamrup district-ah pakhat ṭheuh an ni.

Thosi seh aṭanga kai theih, JE vei hi Assam-ah hian ni 25 chhungin mi 274 an awm tawh. Fur laiin he hri hi kai an tam zual ṭhin.

NHM chuan he hri laka invenna tur kaihhruainate a tichhuak a, health worker-te pawhin state chhungah awareness campaign an nei bawk.

Kum 2021 khan Assam-ah hian JE vangin mi 40 in nunna an lo chan tawh bawk a ni.