TMC MP-ten Assam-Meghalaya border agreement sut an phut

Trinamool Congresss (TMC) MP-te chuan tun hnaia Assam leh Meghalaya sorkarin ramri chungchanga inremna an ziah chu sut leh tura phutin, Delhi-a Vijay Chowk-ah Thawhlehni khan lungawi lohna an lantir a, thuziakte an keng a ni.

Assam leh Meghalaya hian March thla khan kum 50 chuang zet ramri chungchanga buaina an lo neih tawhna, hmun 12 zinga hmun parukah inremna an ziak a ni.

Meghalaya-a TMC hruaitu Mukul Sangma chuan sorkar laipui chu state mipuite ngaihdan leh duhdante ngaih pawimawh sak tur leh, Assam-Meghalaya border agreement chu sut leh turin an phut tih a sawi.

"Hun rei tak state pahnihte ramri buaina neih tawh hi sorkar laipui hian a ngaihven ṭhat a ngai a ni. Tuna inremna an lo siam tawh hi Meghalaya mipuite duhdan a ni lo a, hei vang hian ṭhiah leh a ngai a ni," tiin TMC chuan an sawi.

Border agreement sut tura rang taka hma la tura sorkar laipui an phut bakah, TMC chuan Eight Schedule-a Garo leh Khasi telh an phut bawk.