Tripura-in August-ah Mi nuai 2 test hman tum

Tripura sorkar chuan an state-a hripui leng mek darh zel tur venna kawng khat atan August thla chhungin Covid-19 sample nuai hnih chuang test hman a tum tih law minister Ratan Lal Nath chuan a sawi. 

Minister chuan August thlaah antigen testing kit leh RT-PCR khawl hmangin nitin sample 7,000 test tum a ni, a ti. "Tripura-ah sub-divisional leh district hospital-te bakah Primary Health Centre (PHC) 116 leh Community Health Centre (CHC) 22 a awm. 

PHC leh CHC-ah hian antigen kit hmangin nitin mi 25 zel test an ni ang a, RT-PCR test turin sampla panga zel lak a ni bawk ang. State chhunga PHC leh CHC hrang hrang aṭangin nitin 4,000 chuang kan test thei dawn a ni," a ti. 

An state-a lut turte chu antigen testing kit hmangin test neih sak zel an ni dawn tih sawiin, ramri chhehvel biala chengte bakah helper, driver, industrial worker-te pawh a tahtawlin test neihsak vek an ni dawn tih a sawi bawk. 

Tripura hi state zingah sample test nei ṭha ber pawl niin, sample  91,386 a lakhawm tawh a, heng zingah 90,288 chu enfiah ni tawhin, antigen test kit hmangin 2,633 enfiah a ni tawh bawk. An test rate hi mi maktaduai khatah mi 22,611 sample endik sak tawh ang an ni a, recovery rate hi 73.82% a ni.

Nilaini khan Covid-19 kai, Agartala Government Medical College (AGMC)-a enkawl kum 38 mi chu a thi a, kar khat chhunga an state-a hripui vanga thi pahnih an awmna niin, hripui vanga thi hi mi pathum an awm tawh a ni. 

Nilaini khan hri kai hmuh chhuah thar mi 98 awm lehin, Tripura-a Covid-19 kai hmuh tawh hi mi 2,282 an tling tawh.