Assam tuilianin ziaawm lam la pan thei lo ; A ṭul huna che chhuak thei turin AIF inring

Assam-a tuilian chuan ziaawm lam a la pan thei lo a, Brahmaputra lui kama cheng mi nuai chuang zetin harsatna an tawk mek.

Tuilian hi Lakhimpur leh Karim­ganj district-te'n an tuar nasa zual a, heng hmunah te hian Brahmaputra lui chuan hlauhawm chhinchhiahna a pel tawh a ni.

Brahmaputra bakah hian lui pali - Hailakandi leh Kushiyara Barak leh Katakhal-te pawh an lian a, hei hian harsatna thleng hi a belhchhah hle a ni. Assam State Disaster Management Authority (ASDMA) chuan harsatna tawk hi mi 1,01,809 vel an nih thu sawiin, khaw 140 chu tuilian hian a chim tawh tih an tarlang. Thlai chinna hmun ram hectare 385.67 vel zet chu a chimpil tawh bawk. Karimganj chu a tuar nasa ber niin mi 97,000 chung chu hmun him lamah sawn chhuah tawh an ni. Lakhimpur-ah pawh mi 4,500 vel zet chuan himna zawngin an in leh lo an chhuahsan tawh. Hmun eng emaw zatah relief camp siam a ni tawh a, relief distribution point 130 chuang siam a ni tawh bawk.

Assam-ah hian kumtin tuilian avangin chhungkaw tam takin harsatna an tawk ṭhin a, kuminah pawh mi tam takin harsatna an tawk chho leh mek a ni. Tun hnaia ruahsur avang khan district hrang hranga chhungkaw eng emaw zat chu hmun him lamah thiar chhuah an ni a, state sorkar chuan chhawmdawl hna a thawk a ni. Hetih lai hian Indian Air Force-te chu a ṭul huna che chhuak nghal thei turin an inralring mek bawk. Eastern Air Command (EAC) Air Officer Commanding-in-Chief Air Marshal Anil Khosla chuan, Assam-a tuilian tuarte chhawmdawl hna thawk tur hian aircraft eng emaw zat chu inralrin tir an ni. Air Force sta­tion-te pawh inralring tura hriattir an nih thu sawiin, chhanchhuah hna thawk turin an inpeih tih a sawi. Air Marshal Khosla chuan Navy, Army leh paramilitary force-te pawh inring tura hriattir an nih thu sawiin, hmarchhakin chhiat a tawh thulhah harsatna a awm ṭhin avang­in inralrin a ṭul thu a sawi.

Northeast Frontier Railway (NFR) offical-te chuan tuilian leh leimin avangin Barak Valley region-ah rel tlan dan tih danglam a nih thu an lo sawi tawh a, rel service tihtawp lailawk hian eng chen nge a awh dawn hriat a ni lo. Hetih lai hian lawng hmanga inkalpawhna ṭhenkhat pawh tihtawp lailawk a ni a, mipuite chu fimkhur tura chah an ni. Tuilian tuarte ṭanpui hna hi army leh State Disaster Rescue Force (SDRF)-te'n an thawk a, eitur tlakchham avanga thi an awm loh nan leh, hrileng a awm lohna turin hma lak a ni bawk.