Bangladesh aṭangin Hindu-te Assam-ah an lut

Sorkar laipui chuan Bangladesh-a Hindu sakhaw zuitu eng emaw zat chu dan kalhin Assam-ah an lut ṭhin tih a sawi.

Sorkar laipui chuan March 25, 1971 hnu lamah ṭhenawm ram Bangladesh aṭanga dan loa Assam-a lut an pun chak thu tarlangin, heng mite hi Hindu an ni, a ti. Hemi chungchangah hian Pranab Kumar Mazumdar chu Supreme Court-ah a zualko a, sorkar laipui chu SC hian insawifiah turin a ti a ni. Sorkar laipuiin ziaka a chhanna aṭanga a lan dan chuan Bangladesh bakah Pakistan aṭangin Hindu, Sikh, Christian, Jain, Parsee leh Buddhist-te chu India ramah dan kalhin an lut ṭhin tih tarlan a ni. Hetih rual hian heng mite hian Foreigners Act hnuaiah India rama rawn luh theihna an nei niin sorkar laipui chuan Supreme Court a hriattir bawk.

Bangladesh aṭanga Assam-a dan loa lut ṭhinte chungchang hian politics-ah pawh hmun a chang lian hle a, party hrang hrangte chuan inchirhtheh nan an hmang fo a ni. Congress sorkar hun lai khan BJP leh party dangte chuan dan loa lut ṭhinte ven kawnga hlawhchhamah Tarun Gogoi-a kaihhrruai sorkar an puh a, Congress party chuan sorkar laipui chak loh vangah an puh ve bawk. Pawl hrang hrangte chuan ramdang mi lo pemlutte chungchangah hian chak zawka hmalak an duh thu an lo auchhuahpui fo tawh bawk a ni. Kum 2016 khan sorkar laipui chuan Citizenship Act chu siam ṭhain, he dan tharah hian ram dang aṭanga Hindu leh sakhaw dang zuitute chu khua leh tui nihna pek theih an ni. Hei hian sawisel a tawk nasa hle a, All Assam Students Union leh pawl hrang hrangte chuan he dan sut leh phut hian ṭum eng emaw zat lungawi lohna an lo lantir tawh a ni.