APSC Scam : Police-te'n officer-te handwriting sample la

Assam Pullic Survice Commission (APSC) hnuaia thamna sum lak chungchang thubuai kal zelah, police-te chuan officer eng emaw zat handwriting sample an lakhawm a, heng te hi an zir chiang dawn a ni.

Sample lak sakte hi Assam Civil Services, APS leh service officer-te an ni a, APSC exa­mination answer script-a hming sign-te nen enmil a ni ang. Assam police-te chuan Nilaini khan Assam Combined Competitive Exam chhanna answer paper 1,265 zet an man belh leh a, heng te hi APSC-in kum 2013 leh 2015-a exam a buatsaih ami te an ni. Hengte hi endik a ni dawn a, a kawltute pawh thu zawhfiah an ni ang. APSC chairman Rakesh Paul chu thamna sum lak chungchangah hian mawhphurtu berah puh a ni a, suspend a nih hnuah ban turin hma lak mek a ni.

Hetih lai hian Assam police-te chuan APSC hnuaia thamna sum lak thubuaiah hian official 37-te chu an inrawlh tih an puang. Thubuai siam sak zingah hian Assam Civil Service (ACS) offical 25 leh leh Assam Police Service (APS) official an tel a ni. Heng official-te hi APSC hnuaia hna lakah dik lo taka thamna sum lak thubuaiah inhnamhnawiha puh an ni. He case hi Dibrugarh police-te chuan an chhui a, tun hnai khan Assam sorkarah report hi an thehlut a ni. India Presi­dent Pranab Mukherjee pawhin APSC chairman suspend lai mek Rakesh Paul-a ban a nih leh nih dawn loh chungchangah Supreme Court (SC) thu a ngai­chang a ni. Ban a nih leh nih loh tur chungchangah hian Supreme Court hian sorkar laipui hriat­puiin President Office chu hriattir­na a pe ve leh dawn a ni.