Manipur sorkarin infiam mite hamṭhatna ngaihtuah sak tiam

Manipur, State Youth Affairs and Sports Minister Letpao Haokip chuan infiam miten hma an sawn zel theih nan leh, sports chawisan zel a nih theih nan state sorkar chuan hamṭhatna tam zawk a ngaihtuah sak dawn tih a sawi.

Sports Minister Letpao Haokip chuan infiam mi, state aiawha National level-a tel te hnenah ni khat atana an sum hman tur cheng 200/- a pek ṭhin chu cheng 1,000/-ah tihpun a nih tur thu a sawi. He thu hi Mary Kom Regional Boxing Foundation (MKRBF)-te'n feli­citation function an buatsaih a hmanpuinaah sawiin, Manipur infiam mite chu ṭan la deuh deuh turin a fuih. Mary Kom-i'n khawvel huapa dinhmun sang tak a luah thei chu a lawmpui thu a sawi rualin, kum lama naupang zawkte chu Mary Kom anga tumruhna nei a, sang tak thleng thei tura chhel tura a duh thu a sawi. Haokip chuan infiam mite chuan insum theih an mamawh bakah, an ei leh in an tih ṭhat a ngai a, hei hi sorkar chuan hriain infiam mite tan ham-ṭhatna kawng a dapsak reng a ni, a ti. Tunhnaia state level boxing championship neih zawh taka Gold, Silver leh Bronze medal late hnenah pawh state sorkar chuan pawisa a pek thu a sawi bawk.