AP sorkarin sipai thi chhungte zángnadawmna pek a tipung

Arunachal Pradesh Chief Minister Pema Khandu chuan sipai thi chhungte hnena záng­nadawmna state sorkarin a pek ṭhin chu tihpun a nih thu a sawi.

Arunachal CM chuan sipai an duty laia nun­na chan eng emaw zat an awm ṭhin thu sawi­in, hnam pasalṭha thi chhungte hnena zángna­dawmna pek ṭhin chu state sorkar chuan a remti a ni, a ti. Hemi chungchangah hi Union Defence Minister Arun Jaitley leh Minister of Home Affairs hnenah ziaka thehluh a nih tawh thu sawiin, hman nghal a ni ang, a ti. Hei hian Central Para Military Forces leh Armed Forces-te a huam dawn a, Arunachal mi leh sa an ni emaw, Arunachal-a an duty laia thi sipai-te a huam dawn a ni.

Arunachal sorkar hian sipai an duty laia thi te chu an chhungte hnenah zángnadawmna cheng nuai hnih a pe ṭhin a, hei hi cheng nuai 50-ah tihpun a ni dawn ta a ni. Hei bakah hian nunna chan ni lo, ramtui lei loa awm zui tate hnena cheng nuai khat pek ṭhin chu, cheng nuai 10-ah tihpun a ni dawn a, duty laia hmelma kut tura hliam te hnena cheng 25,000/- pek ṭhin chu, cheng Rs.50,000/- ah tihpun a remti bawk.

Khandu chuan leh­khaah hian Army leh Para-Military Forces-te chuan Arunachal mipuite an thlamuan thu a ziak a, an inkarah inlaichinna ṭha tak a awm thu a sawi. Khandu chuan Chief Minister atana lakluh a nih hnua a ngaih pawimawh ber pakhat chu state mipuite himna a nih thu a sawi a, hemi kawnga sipaite hna thawh chu a chhuan thu a sawi. AP chu ramri depa awm a nih avangin kawng hrang hrangah fimkhur a ngaih ṭhin thu a sawi. Ram mipuite himna atana thawktu sipai te chu duhsakna pek an phu thu sawiin, an hnathawh pawimawh zia a tarlang bawk.