Hmarchhakah bawng talh khap duh lohna lantir zel

Sorkar laipuiin ram puma talh tura bawng hralh leh lei a khapna chuan hmarchhakah pawh nghawng a nei lian chho zel a, hmun hrang hrang­ah duh lohna lantir a ni.

Arunachal Pradesh-ah chuan Arunachal Pradesh Youth Congress (APYC) huaihawtin Itanagar khaw­puiah kawnn zawh a ni a, thlawp a hlawh ṭha hle. APYC-te chuan sorkar laipui khapna thupek hi sut leh an phut thu sawiin, bawngsa chu an ei zel tur thu leh thlai hnah ei nen a danglam chuan loh thu an sawi. Bawngsa ei chu an tan chuan thlai ei ang tho a nih thu sawiin, khapna hi an zawm dawn lo tih an sawi a ni. Sorkar laipui chu bawng khapna tichhuak tura thuneihna nei loah an puh bawk.

Arunachal Pradesh Congress Committee (APCC) huaihawtin district leh unit hrang hrangah lungawi lohna lantir a ni bawk a, Congress headquarters Rajiv Gandhi Bhawan aṭangin Mithun Gate thleng kawng zawh a ni. Lungawi lote hian Governor P B Acharya hnenah memorandum an theh lut a, an thil phut hrang hrang an thlen. APCC president Jikke Tako chuan, "Hmarchhak hi tribal hnam hrang hrangte chenna a ni a, sa ei chu kan hnam nuna bet tlat a ni. Kan hrawkin ghee leh dal-te aiin sa tui a ti zawk a, bawngsa ei inkhap sak hi thil theih loh a ni" a ti.

Arunachal Chief Minister Pema Khandu pawhin tunhnai khan national news channel pakhatin an kawmnaah bawngsa a ei thu te sawiin, khapna hi ennawn leh tura a duh thu a sawi. Union Information and Broadcasting Minister M. Vena­kiah Naidu chuan hemi chung­chang hi ennawn a tiam niin Khandu chuan a sawi bawk.

Assam Finance Minister Himanta Biswa Sarma pawhin hralh sum atana bawng talh leh zawrh khapna hi hmarchhakah chuan kalpui a rem ve loh thu a lo sawi tawh. Hmarchhak political party hrang hrang inzawmkhawmna North-East Democratic Alliance (NEDA) convener ni bawk Sarma chuan sorkar laipui thutlukna hi ennawna siamṭhat ngai niin a sawi a, bawng talh leh a sa ei khap chuan hmarchhak mi nawlpui a nghawng thu a sawi bawk. Meghalaya-ah hian BJP hruaitu huaihawtin kar kalta Inrinni khan “bitchi-beef” fest neih a ni a, sorkar thuchhuak duh lohna lantir a ni.

Hetihlai hian Union minister Kiren Rijiju chuan khapna hian hmarchhak mipui a nghawng ve loh thu a sawi thung a, mipui nawlpuiin an zawm lo tih a sawi. Hemi chungchangah hian media-te chu hmarchhak state - Assam, Arunachal Pradesh, Nagaland, Mizoram leh Manipur-te tlawh tura sawmin, heng hmunah te hian mipuiin harsatna an tawk lo a ni tih fiah turin a ngen. Bawng talh leh a sa ei khapna avang hian heng state-ahte hian buaina a awm lo a, mi man pawh an awm lo, dan pangngaiin mipuiten bawngsa an ei reng a ni, a ti. Hetih rual hian Meghalaya-ah erawh dodalna a awm tih a sawi a, mahse hei pawh hian mipui nawlpui a ngawng loh thu a sawi. BJP party hruaitu pahnihten party an chhuahsan nia thu thang chungchangah engmah finfiahna a awm lo niin a sawi a, Congress party-te thuchhuah a ni a, party chhuahsan anga tarlante hian party an chhuahsan thu offical-in an puang lo niin a sawi bawk.

Rijiju chuan sorkar laipui khapna hi Congress party chauhin an dodal niin a sawi a, thudik lo thehdarh a tam thu a sawi bawk.