Air India-in Guwahati-Bangkok service tir tum

Air India chuan hmarchhakah an huang nasa takin an zauh tawh a, tunah hian Assam khawpui Guwahati leh Thailand khawpui Bangkok inkara thlawhtheihna service tir turin hma an la leh mek.

Hmarchhak hian Air India market share 17% lai a luah phak a, hei hi tisang chho zel turin company chuan hma an la mek a ni. Air India Chairman Ashwani Lohani chuan hemi chungchangah hian kar kalta Zirtawpni khan Guwahati-ah thuthar thehdarhtute kawmin, an hmachhawp te a puang a ni. Lohani chuan Guwahati-Bangkor service a awm thuai beisei a nih thu sawiin, hei hi hmarchhak mipuiten an chhawr ṭangkai ngei an beisei thu a sawi. An company chuan kum 2016-17 chhung khan North Eastern Council (NEC) aṭangin cheng vaibelchhe 35 vel sum an lakluh thu a sawi. Tun dinhmunah hmarchhak huamchhungah ni tin thlawhtheihna 24 service tir a nih thu sawiin, hei hi tihpun zel tum a ni,a ti.

Managing Director ni bawk Lohani chuan Guwahati - Bangkok bakah hian Guwahati - Kunming pawh service tir tum a nih thu sawiin, kar khatah vawi thum an thlawk ṭhin dawn a ni, a ti. Air India hian kar kalta Inrinni aṭang khan Kolkata - Guwahati service an nei thar bawk a, June 28 aṭang khian New Delhi - Guwahati service hawn a nih leh dawn bakah, September 1 aṭangin Guwahati-Dibrugarh-Pasighat (Arunachal Pradesh) service a awm thar bawk ang. Guwahati - Mumbai - Hyderabad service tir turin hma an la mek bawk a, hemi chungchangah hian company aiawhte leh Assam Chief Secretary-te pawh an indawr tawh nia tarlan a ni.