Manipur-ah Hill People’s Day vawi hnihna hmang

Manipur Chief Minister N Biren Singh-a'n mipuiten awlsam zawka minister leh MLA-te an dawr theih nana People's Day hman a nih tur thu a lo sawi tawh chu hman chhoh mek zel a ni a, a ṭum hnihna atan kar kalta Inrinni khan Chief Minister Secretariat complex-ah Hill People’s Day hman a ni.

Chief Minister N Biren Singh chuan mipuiten awlsam zawka sorkar an dawr theihna tur hun hi thla tin ni 10 niah hman a nih ṭhin tur thu a lo sawi tawh a, he niah hian minister leh MLA-te chu an inṭhut chhawk ṭhin dawn a ni. Inrinni-a Hill People’s Day hmannaah hian chief minister chu mipui dawr theih turin a ṭhu a, mi 800 velin an dawr hman a ni. Heng zingah hian pawl hrang hrang aiawh 260 an awm a, hill district huamchhunga khaw hrang hrang aṭangin mi eng emaw zat an tel bawk. Biren Sing chuan heng mite hi hmai chhanah lo kawmin, an harsatna leh an mamawhte a lo ngaihthlak sak a ni.

Manipur CM chuan he hun hi mipuiten awlsam leh langtlang zawka sorkar an dawr theih nana BJP kaihhruai sorkarin a ruahman a nih thu sawiin, mipuiten ṭangkai takin an hmang cho mek a ni, a ti. State inrelbawlna chu mipui nawlpui hriat theiha chhawp chhuah te, tlang mi leh hnam hnuaihnung ber thleng pawha sorkar inrelbawlnaa an tel ve theih nan leh, an harsatna leh mamawhte an thlen ve theih nana buatsaih a nih thu a sawi bawk.

Inkawmna hun hi zing 8:45- 2:30 pm chhungin neih a ni a, CM dawr tur hian mi tam tak chu zing hma takah Secretariat complex-ah hian an pungkhawm a ni.