Tripura sorkarin bawng talh khapna thlawp lo

Tripura Chief Minister Manik Sarkar chuan sorkar laipuiin talh atana bawng hralh leh zawrh a khapna chu an thlawp lo tih a sawi a, hemi chungchanga Kerala sorkar hmalakna chu an thlawp dawn tih a sawi.

Kerala Chief Minister Pina­rayi Vijayan chuan state hrang hrang chief minister-te chu bawng talh khap chungchangah hian ngenna thawnin, sorkar laipui thupek hi zawm lo turin a ngen a ni. Kerala CM ngenna hi Tripura CM Sarkar chuan ziakin a chhang tawh a, khapna thupek chhuah chu an thlawp loh tur thu leh, Kerala sorkar hmalakna an thlawp zawk tur thu a hrilh a ni. Sarkar chuan chief minister meeting neih pawh a thlawp thu sawiin, khapna dan sut leh a nih theih nana hmalakna reng reng an thlawp tur thu a hrilh a ni.

Bawng hralh leh talh khapna dan hian rampum a nghawng a, Kerala chu state anga dodalna lantir nasa ber pawl a ni. Kerala-ah hian sorkar laipui thutlukna sut leh tura phutin vawi eng emaw zat nawrh huaihawt a lo ni tawh a, CM Vijayan pawhin kawng hrang hrangin dodalna a lantir a ni. Hmarchhak state zingah Meghalaya chu khapna dan dodal nasa ber an ni a, BJP mi leh sa ngei pawhin dodalna lantirin nawrh an huaihawt fo a ni.

Hetih lai hian Assam Finance Minister Himanta Biswa Sarma chuan bawng talh khapna zawm leh zawm loh chu state sorkar kuta awm niin a sawi. North-East Democratic Alliance convener ni bawk Sarma chuan bawng talh khapna hian ram pumah nghawng a nei chho mek tih sawiin, state tam takah dodalna lantir a ni a, hmarchhak state ṭhenkhatah pawh lantir a ni, a ti. Hetihrual hian sorkar laipui khapna hi a zawm leh zawm loh chu state sorkar kuta awm niin a sawi.

Sarma chuan Assam chu BJP kaihhruai sorkarna ni mah se, khapna hian zawm a hlawh lo a, mipui nawlpuiin bawng sa an la ei reng thu a sawi. Hemi chungchangah hian state sorkar chuan thuneihna lek a tum lo a, mipuite duhthlanna a ni, a ti. Assam ang bawkin BJP sorkarna Manipur leh Arunachal Pradesh-ah pawh sorkar laipui khapna hian zawm a hlawh lo tih sawiin, mipuiten dan pangngaiin sumdawn nan leh ei atan bawng an la talh reng thu a sawi bawk.