United Naga Council-te'n Sorkar nena inbiak hun tihchian phut

Manipur-a United Naga Council (UNC)-te chuan district chung­changa sorkar nena in­biakna neih leh hun tura ruat bawhpelh a ni ṭhin chu pawi an tih thu an sawi a, inbiakna neih hun tur hi tichiang thuai turin phut tih an sawi.

UNC-te chuan Minis­try of Home Affairs kaihhruainaa inbiakna neih ṭhin chuan rah ṭha a chhuah chho mek niin an sawi a, hetih lai hian inbiakna neih leh hun tura ruat bawhpelh a ni ṭhin chu pawi an tih thu an sawi. Inbiakna neih hnuhnung ber chu May 19 kha niin, he hunah hian sorkar laipui aiawh, Manipur sorkar leh UNC aiawhte an tel a ni. He hunah hian inremna siam a nih loh avangin inbiakna hi neih leh tura tih a ni a, mahse tun thlengin neih a la ni leh lo. Hei hi UNC-te chuan an hrethiam lo takzet tih an sawi a, inbiakna neih leh hun tura ruahman chu ni 10 chuangin a pel tawh niin an sawi. Hetih lai hian inbiakna neih hun tura an ruat ni tak erawh tarlan a ni lo.

District chungchangah hian June 19 khian in­biakna hi neih leh tura tarlan a ni a, mahse UNC-te chuan inbiak felna a la awm lo tih an sawi. May 19-a inbiakna neih a nih hma khan sorkar chuan inbiakna neih hun tura ruat chu an lo bawhpel tawh nia tarlan a ni a, hemi chungchangah hian UNC-te chuan thuchhuah an lo siam tawh bawk.

Manipur sorkar chuan kum 2016 khan district pasarih a din thar a, hei hi UNC-te chuan Naga-te rahbeh tumnaah ngaiin nasa takin an dodal a ni. Naga-te chuan sorkar thutlukna sut leh phut hian nikum November 1 aṭang khan National Highway (NH) an dangchat a, ni 130 chuang zet an kalpui zui a ni. Inremna a awm mai theih loh avangin buaina hi a punlun nasa hle a, kumin March thlaa BJP kaihhruai sorkar thar a din hnu khan UNC-te chuan NH danchah hi an tawpsan chauh a ni. Kawngpui dan chah hi tihtawp tawh mah se, UNC-te thil phut tihhlawhtlin a la ni lo.

March 19 khan inbiak­na neih a ni a, MAy 19 khan neih leh niin, inbiakna hi neih leh tura ruahman a ni bawk.