Nagaland CM Neiphiu Rio-a'n Amit Shah a hmu

Nagaland chief minister Neiphiu Rio chuan union home minister Amit Shah hmuin, Naga peace talk neih mek chun gchangte a sawipui.

New Delhi-a tun kar tir lama CM Rio leh Home Minister Shah-te meeting-ah hian North East Democratic Alliance (NEDA) convenor, Assam chief minister Himanta Biswa Sarma pawh a tel.

Rio chuan Naga issue chinfel tuma hmalakaah inbiakna neih zel a la ni tih sawiin, tihfel a nih thuai theihna turin beiseina sang tak an neih thu a sawi. Assam nena ramri buaina an neih mek chungchang pawh nakkum assembly inthlan zawhah tihfel a ni dawn tih a sawi bawk.

Naga peace talk neih mekah, NSCN-IM-in Naga tana flag leh constitution hran an phut chungchang bikah inremna hi an la siam thei lo a, sorkar laipui chuan an thil phut hi a pawmpui thei lo a, hei vang hian inbiakna hian hma a sawn thei rih lo a ni. Hetih lai hian NSCN-IM chuan flag leh constitution chungchanga an thil phut chu a hma pawhin chinfel a ni tawh a, mahse RSS lamin an thuthlung nena a inmil loh avangin an dodal a, hei vang hian sorkar laipui chuan inremna siam tur pawh hi a tihkhawtlai phah niin an puh thung.

Hetih lai hian sorkar laipui chuan NSCN helpawl aṭanga peng hrang hrangte chu inkahhai puang turin inremna a siampui a, NSCN-NK, NSCN-R leh NSCN K-Khango bakah Niki Sumi kaihhruai helpawl chu inkahhai puang turin inremna a ziahpui tawh a ni.