Meghalaya sorkarin zirtirtu 2,400 chuang dah nghet dawn

Meghalaya cabinet chuan sorkar school-a lower primary teacher chhawr lai mi 2,447-te dah nghehna tur a pawm.

Chief minister Conrad K Sangma chuan, zirtirtute dah ngheh an nih tur thu hi sawiin, kum 1993-a state sorkarin lower primary school-te a lakchhawn hnu aṭang khan zirtirtu tam tak chu dah ngheh chhoh zel an ni a, tunah hian la nghet lo 2,447 an awm a, heng mite pawh hi dah ngheh an ni ve leh dawn tih a sawi a ni.

State sorkar hian district council-a school 2,568 a lachhawng a, hetih lai hian school 136 erawh a la tel lo thung.

Cabinet chuan pay scale inang tur post-te a ruala advertisement pakhatah tihchhuah rawtna a pawm bawk. Meghalaya Public Service Commission chuan post hrang hrang tan exam hi a hran vekin a buatsaih ṭhin a, hei hian hun a heh avangin ṭum khatah test hi an buatsaih tawh dawn a ni.